憂鬱症發作/一個憂鬱症患者的自白：淺談憂鬱症

　　先介紹筆者自己，我都系一個抑鬱症患者，主要由兒時心理創傷而形成，有見過心理醫生接受治療，同時亦有靠自己既閱讀去了解自己同埋了解何謂抑鬱症（例如拉康既精神分析，唔敢話自己識好多野，但至少我識既野可以幫到我自己），而呢一個過程對於我日後點樣有效面對抑鬱症，有極大幫助。

　　事先聲明，我只系講返自己既經驗，未必可以套用系所有抑鬱症患者身上。

　　抑鬱症並唔系腦分泌失調然後就有自殺傾向銜簡單。

　　抑鬱，從字面理解，就系會將鬱結抑壓，唔會抒發出黎。呢個系一種特別既心理狀態，好難理解。

　　可能你會問，渠唔開心做咩唔同朋友講？或者渠做咩唔去諗點樣解決果D令渠唔開心既問題？其實呢D都系常人好容易會問既問題，但問完只會顯露出你對抑鬱既一無所知。

　　點解一個抑鬱症患者唔會向其他人傾訴，系有好複雜既原因系入面，或者我試下講幾個。第一系怕我講完唔開心既野，會令你唔開心；或者我曾經同你講過我既唔開心，但你唔理解；或者我覺得你幫唔到我，因為我覺得自己陷入一個死胡同，點樣都解決唔到；或者其實講出黎都無意思；或者呢D唔開心既野系我內心既秘密，好難直接講出黎⋯⋯有太多原因可以令抑鬱症悲者（我地）唔肯主動傾訴。

　　但同時我地亦會有時想比身邊既人知道我地既唔開心，但會用一種比較間接而隱閉既方式——我地好想比人知道，但又同時無辦法直接同人講，只有等細心既人發現，但呢種細心既人大概一百個入面都唔知有無一個。

　　系大眾面前我地都系一個正常人，我地會玩得好High又會笑得好燦爛，但偶爾我地心入面既悲傷都會泛濫，微微同你透露小小我地既真實心情，但你通常都唔會察覺到，或者你只會覺得系我地一時失常而爾。

　　想講又唔講既呢一種掙扎會伴隨我地一生，我地好難去同其他人表識自己真正既情緒。然後你既情緒得唔到釋放，你選擇壓抑。呢種惡性循環如此落去，壓抑總有一日會爆炸，然後我地就會去自殺。

　　自殺既念頭系一直都會有，我地會因為成日唔開心而想自殺，但又會呃自己只要忍多陣就ok；或者我未有勇氣去自殺；或者我地既內心其實唔系想自殺，只系而家睇落好似走投無路，眼前既問題好似一個個死結，除左自殺之外都唔知點算。

　　抑鬱症患者既唔開心由邊度而黎？有D可能系細個果陣既陰影、家人既壓力、朋輩間既相處、自卑、工作或學業⋯⋯仲有一種系唔知系邊度黎既唔開心——總之我就系突然唔開心，但我講唔到點解，我真系唔X知點解我會銜唔開心。

　　我地好迷惘，我地有好多矛盾，而你唔會知道點樣幫我地，我地都唔知點樣可以幫到自己。

　　抑鬱系一場唔會完結既戰爭，但都會有休戰既時候，或者可以休戰到你死既果一刻。

　　如果你宜家比我再揀過，我可以揀我有無抑鬱症，出奇地，我會選擇有。抑鬱唔系一種病，亦唔系一種弱點，同樣渠都可以系一種優勢，一種成長既契機，渠會陪伴住你，直至你成為一個更好既人，然後你就可以同渠和平相處。

　　抑鬱症患者經常都會陷入一個個死胡同，我地見唔到問題可以解樣解決，我地覺得咩都做唔到，做咩都無用，我地好無助，但又無辦法揾到幫助。

　　其實我地需要既系一個全新既方法，一個我抑鬱症患者地從來都未諗過既方向。幫助抑鬱症既其中一個方法，就系話比渠地知道，其實有好多野都系渠地呢一刻未諗到既。我地必須提供一個新既可能性，不論最後結果會系點，但呢個新既可能性或者會改變現時既處境。

　　好多人話只要抑鬱症患者離開壓力源頭，就可以得到紓緩，但筆者認為銜樣系治標唔治本，因為你系不斷逃避緊。而且其實可以逃避既，我地都已經逃避左，而家最大問題在於，有好多壓力系我地無法逃避既。

　　我地抑鬱症患者需要學習點樣去面對抑鬱症本身，我地需要學習點樣去面對自己，因為抑鬱症就系我地自己既一部分。就好似一個小一既小朋友，當我地立即比四則運算練習比渠，渠一定做到想死。系抑鬱症患者眼中，你比十題數渠做，渠會覺得系做緊一百題條，好似做唔完，自己又唔系好識做。

　　學習系一個過程，小朋友系學識之前唔會知道，當渠完全明白左要點樣做之後，果十題數其實唔難。抑鬱症患者就系長期處於小朋友未開始做數、或者只系做緊第一題數果陣既階段。

　　抑鬱症患者好難擺脫悲傷。其中我地有一個好大既誤解系，以為悲傷系可以解決。其實人系無法唔悲傷，除非你系智者，其實智者都未必得。EQ高唔系代表渠唔會唔會開心，唔會唔開心既人其實系EQ低，因為人都有情緒，EQ高既人識得用方法去面對自己既情緒，然後等呢種情緒慢慢淡化。悲傷情緒系一種signal，比你知道你唔中意某一樣野，而當你完全接收左呢種signal，你既腦袋就會慢慢減少呢種signal既發放。每個人都有多於一種渲泄情緒既方式，有人大喊，有人做運動，而抑鬱症患者需要揾到一種有效既渲泄方法。

　　尋找方法，然後嘗試並學習面對自己既情緒，當中必然經過好多難關，但當中你亦會系路中拾起屬於自己既寶物。呢篇文章無法令你解決抑鬱症，就好似我同小朋友講只要你識平衡就識踩單車，但小朋友都無可能即刻學識。學習既過程需要好多嘗試，唔系本文可以講曬，但至少本文可以比你知道多少少何謂抑鬱。

　　擁有抑鬱症，代表你有機會與眾不同。你更能理解其他人既情緒，你更能理解自己、同自己好好相處，呢一種能力，其實好多所謂正常人都無。

　　有一日我地會愛上自己。共勉。

　　想了解關注更多抑鬱情緒，抑鬱症的資訊請關注微信公眾號： kyyq66。